I mars i fjor reiste tre NBU`arar til Russland for å delta på seminaret Dialog Murmansk. Internasjonalt Utval i Norges bygdeungdomslag hadde vore interessert i samarbeidspartnarar utanlands, og hadde i framkant av turen fått kontakt med organisasjonen Youth Humanistic Movement (YHM). Dette er ein liten, men arbeidssam organisasjon som har gjennomført 30 større og vellukka prosjekt.
Problematisk avstand
 |
YHM var på utkikk etter ein norsk samarbeidspartner, men for NBU sin del vart det vanskeleg med noko større samarbeid utover studieturen til Dialog Murmansk.
" Avstand er meir avgjerande enn vi hadde tenkt på førehand i forhold til det typen samarbeid som vi hadde tenkt oss" skriv turdeltakarane i rapporteringsskjemaet til LNU etter turen - som det vart gjeve demokratimidlar til.
Særskild ville den store fysiske avstanden gjera det dyrt og tidkrevjande å få i stand møteplassar mellom dei to organisasjonane. Dessutan er NBU og YHM såpass ulike organisasjonar at det ville ha vore vanskeleg å samarbeida om felles saker.
- Medan me fyrst og fremst driv med bygdepolitikk, konsentrerer dei seg om rettferdigheit og dei store spørsmåla. Men det var veldig interessant å sjå på arbeidsmetodane deira, noko me allereie har drege lærdom av sjølve, seier generalsekretær i NBU, Astrid Seime.
Føremålet med turen og føresetnaden for dei tildelte demokratimidlane var at ein skulle sjå på om eit samarbeid med YHM kunne vera mogleg; det var ikkje gitt at ein faktisk skulle gå inn i større samarbeid.
Konkrete resultat av work shop
 |
Internasjonalt utval er klare på at turen hadde mykje føre seg. Hovudføremålet med turen var Dialog Murmansk - eit seminar organisasjonar i heile Europa vert inviterte til. Poenget med seminaret var å diskutera framtidsutfordringar for ungdommar på kontinentet, samt å sjå på positive tiltak.
I det nemnde rapporteringsskjemaet viser til følgjande vinstar av turen til Murmansk:
- å vere aktive og reise ut å møte engasjert ungdom.
- sjå korleis ein annan organisasjon er organisert og såleis få nokre idear som ein kan ta med seg vidare inn i organisasjonen. Det kan vere enkle ting som oppslagstavle for alle, work shop - noko ein kan gjere i NBU, til dømes på Landsstevnet
- å skrive søknad - det er ei god øving og noko vi absolutt må gjere meir av i framtida.
- prosessen - lære litt og sjå korleis den er.
NBU-utsendingane Leif Roar Bævre, Agnete Børresen og Astrid Seime deltok på tre workshopar i Murmansk, og meiner det gav konkrete resultat:
"NBU nytta work shop før generaldebatten under årsmøtet. Resultatet var at ein auka andel av årsmøtedelegatane gjekk på talarstolen", står det i rapporten.
